ايمان العدوى تكتب :البعد قرار

 ابعد .. عن اللى طبعه مش طبعك , عشان الطبع عمره ما بيتغير , واللي مالوش أصل ولا كبير هيصغرك قدام نفسك قبل الناس ,

 ابعد .. عن الكذاب والخاين عمره ما هيكون مخلص , الإخلاص فعل خفى لا رقيب عليه إلا الضمير ,

 ابعد .. عن أى حد هونت عليه ولو لمرة واحدة , هتهون عليه ألف مرة ,

ابعد .. عن الناس القاسية وحط تحت كلمة قاسية ١٠٠ خط اللي مالهُمش عزيز ولا غالي ,

 ابعد .. عن اللى اختار صاحب غير صحبتك وفضل متعته الشخصية عليك , اللى بيحبك لو حطوا الدنيا تحت رجليه مش هيختار غير صحبتك انت بعد ما بيعت الدنيا عشانه واختار يكسرك ,

 ابعد .. عن أى حد أنانى مش شايف غير نفسه وبس ,

 ابعد .. عن الناس اللى شايفه نفسها ما بتغلطش ,

 ابعد .. عن حد حاولت تقربلة وتطيب بخاطره وكسر بخاطرك ,

 ابعد .. عن اللى حاولت تقربله خطوة وهو فضل مكانه ,

 ابعد .. عن أى حد ما فهمش إنك سامحته مرة واتنين عشان معزته عندك وهو فاكر نفسه أذكى منك ,

 ابعد .. عن أى حد عارف إيه ممكن يوجعك ويجيب سكينه يحطها فى جرحك ,

 ابعد .. عن كل واحد شايف غلطته هينه ومش شايفها أصلاً ,

 ابعد .. عن إى حد إحتاجته فى شدتك وعمرك ما لاقيته ,

 ابعد .. عن الناس اللى فى وجودها هتحس إنك وحيد ,

 ابعد .. عن اللى صغرك فى يوم من الأيام قدام الناس ,

 ابعد .. عن اللى ينسي فعله ومالوش كبير يوجهه ,

 ابعد .. لما إحساسك يتغير ,

 ابعد .. لما ما تلاقيش اللى يحس بيك ويفهمك ,

 ابعد .. وبس .. ما تبصش وراك تانى .. صدقني اللى هيخسرك مش هيعوضك تانى ,

 ابعد .. لما ما تحسش بالأمان وانعدام الثقة ,

 ابعد .. لما متلاقيش حنية ,

ابعد .. انت تستاهل الأحسن , تستاهل حد يعرف قيمتك ويقدرك ويصونك ف قلبه ويشيلك ف عينه

ابعد عن غيرك من غير ما تعاتب , العتاب اتعمل للناس اللى انت لسه باقي عليها ,

خليك باقي على اللى باقى عليك ,

إنك تنسحب من حياة ناس مش مقدرينك وخانوا عشرتك دي مش نداله أو قله أصل ‘ لا دي منتهي القوة والجدعنة مع نفسك ,

” تعلَّق بالله ثمّ بنفسِك ، فلا نفسك تَخون ولا اللَّه يرحل