أسكـت نهـــــائي … كلمات الشاعر / معوض حلمي

   أسكـت نهـــــائي … كلمات الشاعر / معوض حلمي 

بإسم الشعوب اللي دايقه المرار

وغزة اللي تحت البارود والدمار

باكتـب حـروفي بدم ودمـوع

شــايف بعيـني وفاتـح وداني

حارس بيباني وثابـت مكـاني

ومايل ميزان المعادله ف زماني

وكتلة أوروبا بتنــعي الصهاينه

وتور أمـريكاني بيصـدر بيـان

لناس المـداور وغطره وعقال

إجمـع وفـرق وولــــع بخـــور   

وارمي لماريكا دعـاك والندور

واروي جنـينة جنـابها بعينيك

وإدعم خيارها هاترضى علـيك

ولازما تدلك ف مـوزها بإيديك

وافهم بإن النجـاه ف السـكوت

سـلـم هاتسـلم وتقــدر تعيـش

وتملك كراسي وتنفـش ف ريش

واسيبك تطبل واسـيبك تهـلل

شخلل جيوبك هاتنضـف عيوبك

وقـدم ولائـك بنفـطك وجـازك

وكتر نقـوطـك بتـمرك وغــازك

وتفتح بوغازك لناسنا الدواهي

وتبني عشـانهم نوادي ومـلاهي

وتحـرس بجيشك بيوت المـلذه

وتلعــن ف حيـفا ويافـا وغـزه

وتدعي العـرايا لزوم مهـرجانك

وخمـره وبيره وتفتــح بيـبانك 

وتنسى العـروبه الأروبـه البغيه

وجامعة دولها اللي أضحت هفيه

وتؤمر ف شعـبك يغـض البصر

وتنشـر عسـاكر وتنـشر غـــــفر

وتمـنع إذاعتـك تذيع الخــــــبر

هافــرد عشانك سحابة سلامي

وتسمع كـلامي واعزك واصونك

وترقص بسيفك وترفع حصونك

وتفرش بكيفك ف اتخن ميدان

وترفع ف سعر اللمون ع الميزان

لكـن تخــالف وتنطــح وتكـتب  

وصاحب مواقف وتنعر وتشجب

هاناخد الكراسي وتكتر عيوبك

هاتشحت ياغالي وتنضف جيوبك

,فاأحسن تبوس الأيادي اللي مدت

وألقـت إليـك العطــايا الكريـمه 

جاكته وجزمه وكاب أمـريكاني

واوعى الشهـامه تسخن دماغك 

وتدعـم مقـاوم وتدعـم فــدائي

هانطـرد جنـابك وترجـع بـدائي

وأكلك هايبقى الفتات والبواقي

فابوس الخياره الطريه اللذيذه

واشـكر مشــنة ماريكا العــزيزه

واسكـت نهائي ،، واسكت نهائي

…………………………………………. 

بقلمي خون أنوب الجديد معوض حلمي 

منشأة بطاش .. تمي الأمديد .. دقهلية